یاسرشاہ نے ثقلین مشتاق، فضل محمود کا ریکارڈ برابر کردیا

یاسر شاہ نے سری لنکا کے خلاف دوسرے ٹیسٹ کی پہلی اننگز میں 6 وکٹیں حاصل کیں—

پاکستانی ٹیم کے مایہ ناز اسپنر یاسر شاہ نے سری لنکا کے خلاف دبئی میں جاری دوسرے ٹیسٹ کی پہلی اننگز میں 6 وکٹیں حاصل کرکے 13 ویں مرتبہ ٹیسٹ اننگز میں 5 یا زائد وکٹیں لینے کا اعزاز حاصل کیا جبکہ ثقلین مشتاق اور فضل محمود کا ریکارڈ بھی برابر کر دیا۔

یاسر شاہ نے سری لنکا کے خلاف دوسرے ٹیسٹ کی پہلی اننگز میں شاندار بلےبازی کا مظاہرہ کرنے والی سری لنکن ٹیم کے 6 کھلاڑیوں کو آؤٹ کیا جس کی بدولت سری لنکا کی پوری ٹیم پہلی اننگز میں 482 رنز بنا کر آؤٹ ہوگئی۔

ٹیسٹ کیریر کے 28 ویں میچ میں یاسر شاہ نے 13 مرتبہ ایک اننگز میں 5 یا اس سے زائد کھلاڑیوں کو آؤٹ کیا اور اس ریکارڈ میں شعیب اختر کو پیچھے چھوڑ دیا۔

پاکستان کے عظیم کھلاڑی فضل محمود نے 34 اور ثقلین مشتاق نے 49 میچوں میں یہ اعزاز حاصل کیا تھا۔

قومی ٹیم کے سابق کپتان وسیم اکرم 25 مرتبہ یہ کارنامہ انجام دے کر سرفہرست ہیں، عمران خان نے 23، وقار یونس نے 22، عبدالقادر اور دانش کنیریا نے بالترتیب 15، 15 مرتبہ ایک اننگز میں 5 سےزائد وکٹیں حاصل کیں۔

یاسرشاہ نے اس دوران ٹیسٹ کرکٹ میں عمر گل کی جانب سے 163 وکٹیں حاصل کرنے کا ریکارڈ بھی برابر کردیا یوں وہ پاکستان کی جانب سے زیادہ وکٹیں لینے والے مشترکہ طور پر 12ویں باؤلر بن گئے ہیں۔

وسیم اکرم اس فہرست میں 414 وکٹیں لے کر سرفہرست ہیں، وقار یونس 373، عمران خان 362، دنیش کنیریا 261 اور عبدالقادر 236 وکٹیں حاصل کرچکے ہیں۔

یاد رہے کہ یاسر شاہ نے گزشتہ سال ویسٹ انڈیز کے خلاف ٹیسٹ سیریز میں اپنے ابتدائی 17 میچوں میں 100 وکٹیں حاصل کرکے ایشیا کے پہلے اور دنیا کے مشترکہ طور پر دوسرے باؤلر بن گئے تھے۔

You May Also Like

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے